ابنك لو مبسوط بالقاعدة معاك مش هيقعد ع الموبايل..

ولو بنتك مبسوطة معاكي هتجري تحكيلك على كل حاجة من غير ماتقوليلها حصل ايه ومحصلش ايه..

الموضوع بيبدأ من هنا

​

أما الطفل يرجع من الحضانه بيعيط عشان الاستيكه اللي بيحبها ضاعت منه.. فانتِ تضحكي عليه و تمشي.. أو تتريقي و تمشي.. أو متعبريهوش و تمشي.. لإن الموضوع من وجهة نظرك تافه بس من وجهة نظره هو مسألة حياة أو موت.

​

يبدأ الطفل يكبر و يدخل مرحلة المراهقة.. و يحب زميلته في الفصل أو البنت تحب زميلها في الدرس.. يجري العيل على أبوه يحكيله يكون الرد " ده لعب عيال" تجري البنت ع أمها فتقولها " ده شغل أطفال" ركزي ف مذاكرتك احسن.. بعكس صاحبه اللي بيحس بيه و يبدأ يديله نصايح.. سواء يقرب من البنت أو يبعد عنها بس علي الأقل أخد معاه في الكلام..ونفس الكلام مع البنت .

​

الطفل بعد كده بيكبر و بيبعد عن أهله .. و يبدأ الأهل يشوفوا إن ابنهم اللي تعبوا في تربيته عايش مع نفسه و ف حاله.. مش بيتكلم معاهم.. تبدأ الأم تزعل إن بنتها طول النهار قاعدة ع الموبايل..و ابنها مش بيحكي أي حاجة غير لخطيبته و إن البنت سرقته منها.. على فكرة يا طنط ابن حضرتك محدش سرقه.. ابن حضرتك بقاله اكتر من 20 سنة معاكي عايش جسد و بس..

​

في ناس بتعمل لأهاليها بلوك ع الفيس عشان ميعرفوش عنهم حاجة.. في ولد بيحب و بيفضل مخبي عن أهله لإنهم مش فاهمينه.. في بنت بتروح تحب واحد ممكن يطلع يستاهل و ممكن لاء عشان بتعوض اللي ناقصها.. في اللي بيسافروا و مش بتعرفوا عنهم حاجة ومش بيجيولكم غير شهر ف السنه و لا حاجة..

​

صدقوني الموده والرحمه حاجة.. و الحب اللي طالع من القلب دا حاجة تانية.. انتَ صعب تجبر نفسك تحب حد أذاك مرة.. فما بالك حد انت بتدمره نفسيًا لسنين و انت مش حاسس..

​

لما كنت بسمع التليفزيون واشوف اد ايه ف ناس بتحب الجامعه لمجرد انهم بيخرجوا من البيت ويسافروا ويبعدوا عن اهاليهم كنت بستغرب وبقول هو ف ناس كدا بجد...

​

اما دخلت الجامعه قابلت كتير ما بيصدقوا الدراسة تيجي عشان يسافروا ويسكنوا و ميرجعوش.. و أما الدراسة بتخلص بيبقوا مقهورين إنهم راجعين للبيت تاني..

و في اللي بيكون أبوها في وشها بس ماسكة الموبايل عشان هتقعد تتكلم معاه في ايه!!

​

مؤخرًا بدأت ألاحظ إن الناس بتخطب من ٣ ل ٤ سنين.. و بعد سنة تلاقيه خلف.. هو ابنك أسهل بالنسبالك من شريك حياتك.. ابنك مش بتستعدله نفسيًا/ ماديًا قبل ما يجي..

​

الأهالي بتتعب و بتصرف و بتشقى و بتتغرب عشان عيالها.. و الأم بتشتغل و بتطحن و بتقوم بدور الأب و الأم و المدرسة.. و عيالكوا أما بيكبروا بيعترفوا بكل ده.. بس الجانب النفسي مش بيعترفوا بيه.. بيبقى أغلى حد عنده صحبه و أغلى حد عندها حبيبها او صاحبتها.. بس طول النهار بيمجدوا إنكم صرفتوا عليهم و كبرتوهم..

​

ابنِك اللي ياما اتريقتي عليه.. و ابنك اللي ياما ضربته و اتهمته بالفشل.. هو ابنك اللي سايبك و هايص مع صحابه.. و هو ابنك اللي مش بيتكلم معاك.. و هو ابنك اللي طول النهار قاعد ع الموبايل.. و هو ابنك اللي أما يتجوز هيبِرَّك و هيساعدك مادياً برضه بس مش شرط هيحس بالحاجات اللي هتكون بالنسباله تافهة زي ما طفولته كانت بالنسبالك

مش ذنب ابنك إنه يجي الدنيا عشان انتَ نفسك تسمع كلمة بابا بس هو عمره ما حسها.. مش ذنبها إن انت دايمًا سايبها و بتشتغل.. الاهتمام مش لازم أكون في وشه ٢٤ ساعة.. بس أكون حاسس بأتفه الحاجات اللي في حياته واوصله احساس اني حاسه بيه..

 

رسالة للأهالي:

محتاجين نقف مع نفسنا وقفة و نشوف احنا عملنا ايه في عيالنا خلاهم مع صحابهم حاجة و معانا حاجة تاني خالص.. أي اتنين لسه متجوزين فكروا مرة و اتنين و عشرة قبل ما تجيبوا طفل آخر بائس للدنيا دي متعرفوش تدوه الاهتمام الصح.. 

صدقوني لو ابنكم بعيد عادي ممكن نقرب ليه
..الموضوع هياخد وقت.. زي ما سيبتوه سنين هتصلحوه في سنين بردوا و تخلوه يرجَّع ثقته بيكم تاني.. كل غلطة و ليها حل..

​

الرساله بإسم ناس كتير سمعت منهم حاجات كتير عن أهلهم.. سمعت منهم عن الجانب المادي الرائع و الجانب النفسي المنعدم.. سمعت منهم عن أسباب البعد و تفضيل الصحاب.. و حبيت أوصلها بشكل بسيط.. جايز الأجيال اللي جاية تكون أجيال أكثر ترابطًا مع أهلهم